合桃糊-用新玩具煮又快又方便

呵呵呵~~~我買咗新玩具呀! 家中一直只有一部迷你攪拌機, 實在唔夠用, 左睇右睇, (難過揀老公) 都總是落唔到手, 老爺由興致勃勃陪我睇, 到問都唔再問, 佢都話唔知我想要d咩.

直到可愛嘅娘親出手, 佢成日去華潤超市入貨, 存了很多積分, 問我有冇野想換, oh oh oh, 我心中的機出現了, 可攪, 可煮, 又可打冰, fit到震呀, 仲要平呀! 之前在百貨公司見到大牌子示範同類產品, 好貴呀, 唔捨得, 有d就唔係煮滾, 只是利用打磨時的熱力來煮, 即係唔滾啦, out!

唔駛再考慮, 即call老爺幫我托佢返屋企(都幾重架)! 試機之作, 係老爺喜愛的合桃糊, 制作時間少於20分鐘, 快過落街買糖水外賣. 用新機煮打好嘅合桃露, 如你唔要求滑到流入喉嚨, 可以免去隔渣的步驟, 實在非常方便.

至於清洗, 就要小心d 喇, 因為玻璃杯底連住零件, 唔可以整濕, 所以要把水倒入杯, 洗完, 換水再倒入清水過水, 但玻璃不會藏污, 都好易清理.

朋友問我怕唔怕不明牌子, 我都唔知架, 搏一次啦!

合桃糊上有d深色浮面, 並不是大粒合桃, 而是個面吹涼了, 就起了點點薄膜在糊面上.

材料: (3碗份量)

去殼合桃肉1碗

米 2湯匙(洗好用半碗水浸2小時)

凍開水 2.5碗

冰糖 約30g (甜度要因你自己喜好)

1.     米洗好用半碗水浸2小時

2.     合桃肉放入熱水煮3分鐘

3.     用白鑊慢火炒乾合桃肉至有少少香味, 亦可用焗爐焗乾

4.     把合桃肉, 米連水, 凍水, 冰糖一併放入機

5.     開100度煮至冰糖溶解

6.     再用高速打2分鐘

7.     試甜味及滑度, 如未夠滑再加時打一陣