印尼椰汁九層糕

近日又到測驗週, 我呢d 陪讀嘅, 真係奄悶到就快變人乾. 需要食d甜品黎潤吓, 俾d甜頭自己同個寶貝女.

題外話, 而家做小朋友真唔簡單, 十八段武藝, 樣樣要識d, 再加上日日生活好似參加三項鐵人賽咁, 冇時停, 冇得停. 天主賜俾我呢粒囡唔係特別聰穎, 有時仲有d懶tim, 天性如此, 但勝在心地善良, 簡單, 有種大而化之嘅精神, 佢只對”食”最有要求, 我做阿媽就盡量滿足佢啦, 有時失手, 佢都直接話我架, 但又會幫我清碟, 以示安慰同支持, 你話我點可以唔愛死佢呢!

為咗鼓勵佢, 我尋晚漏夜蒸好一底印尼椰汁糕, 等佢第二朝帶返學, 與同學仔一齊分享.

點解又夜麻麻蒸糕? 就係因為呢隻糕嘅”麻煩性”, 就係….有椰汁會易壞, 但放咗入雪櫃又會變硬, 失去彈性. 所以, 一定要趁新鮮盡快收晒入肚.  如果真係食唔晒要放入雪櫃, 可以隔日拎出黎蒸返軟佢, 但…..煩呀, 又要再攤凍先食得.

有關木薯粉同班蘭香精, 在椰子鋪同印尼雜貨店都有售.

我呢個食譜是幾年前在網上抄返黎的, 減咗糖份, 加多咗班蘭香精而成嘅. 我記得當時是從”為食貓”抄的, 但今日冇辦法搵返出黎, 只好在此向原作者講句多謝!

材料:

木薯粉300g
粘米粉40g
椰汁400ml (大罐裝)
糖230g
暖水300ml
班蘭香精1茶匙(今次落時手震,落多咗,所以好深色)

 

1.     用暖水開溶糖

2.     木薯粉, 粘米粉, 椰汁, 糖水加在一起, 拌勻至沒有粉粒

3.     把粉漿分成2碗, 把班蘭香精加入其中一碗

4.     先倒一層粉漿(綠色)蒸3-4分鐘至透明, 再倒另一層(白色)蒸3-4分鐘, 重覆直至粉漿用完, 最後一層蒸10分鐘, 令全舊糕更實凈

 

 

 

 

 

 

 

 

 

5.     蒸完, 攤凍後脫模切片

**建議第一層同最尾一層用綠色, 完成品會較美觀**