手撕雞 - 超easy, 零失敗

手撕雞 - 超easy, 零失敗

上兩個月屋企附近開咗一間手撕雞專門店, 獨沽一咪只賣雞, 對於嘗新, 我為食一號一定不遺餘力, 一馬當先要試吓. 一食之下, 覺得味道似曾相識. 味道極似朋友W 教我整嘅手撕雞, 好幾年前一齊去野餐時, 佢整呢味拎去, 大家都食得好滋味, 早幾日同佢講起, 當事人竟然毫無印象.

今日心思思又想食, 就自己郁手, 比起出去買, 平一半有多, 仲可以整一雞兩味, 用到盡, 覺得自己做到稱職嘅c9, 不但滿足口腹之慾, 心理都得到極大滿足.

 第二味係咩? Hee hee~~~~ 咪就係要d 雞汁黎淥菜囉, 比清水淥菜鲜味好多架!

材料:
冰鮮雞 1 隻

薑 5片
蔥 兩條
鹽焗雞粉 1/2包

麻油 1湯匙

鹽 1 茶匙


做法 :

1. 去任何一間超市買冰鮮雞一隻(約$3x), 洗凈切去頭, 頸, 尾, 肥膏丟掉, 只留雞腳(放冰格, 下次煲湯)

2. 雞切開一半, 把入面内臟全挖掉, 用半茶匙鹽輕輕擦洗全隻雞, 沖乾凈, 晾/抹乾水

3. 用半茶鹽搽勻全隻雞, 放在深碟上, 胸骨向上, 將薑片, 蔥放上面

4. 水滾隔水蒸20分鐘, 熄火, 不要開蓋, 焗5分鐘

5. 拎出, 用筷子插入肶中, 如沒有血水沁出, 即是已熟, 否則, 加蒸2分鐘, 至全熟

6. 煎皮拆骨, 骨肉分離後, 撈入鹽焗雞粉半包, 我會邊撈邊試, 因為各個牌子鹹淡有分別, 最後, 撈入麻油

7. 各人喜好, 可加入青瓜絲, 蔥粒, 芝麻….

8. 雞骨-----如果屋企有狗仔(喜歡咬骨---即係我家中嘅大小肥人), 可以另外撈埋d骨佢地”損”

9. 蒸完後, 碟中有很多雞汁, 倒入煲仔內, 加水, 少少鹽用來淥菜, 唔怕肥嘅, 可以飲埋d 湯tim.

貼士: --近雞尾有大量肥膏, 盡量剪走晒佢