懶人Hea 早餐- 牛油果香草焗蛋
小肥女升中學後越黎越忙, 晚晚挑”機”夜讀, 哈! 朝早當然係由老媽我用十成功力先叫得醒啦! 早餐唔駛多花款, 最緊要好味同快…快….快
喺鬼佬網見到呢款早餐, 簡簡單單就有樣學樣啦! 小姐收貨讚好味, 又可以高速地食完飛出門口!
買牛油果係最煩嘅事, 超市果d一定係青bee bee 咁, 只好揀d深綠色皮, 放室溫2-3日, 摸到全隻少少林就ok, 仲有, 我會揀有粒靛連住嘅. 網上有人教把牛油果同香蕉/蘋果一齊用膠袋裝住, 可以加快牛油果成熟, 大家不妨做吓實驗!
食譜:
牛油果1個
蛋1只
鹽 少少
意大利乾香草 少少
黑胡椒粉 少少
-牛油果去核, 用匙刮走部份果肉, 擴大少少個凹位方便放蛋
-因為牛油果細, 所以一只蛋分2份就剛好, 如果要2邊都有蛋黃, 就要2隻蛋, 留起部份蛋白
-放上蛋, 灑上鹽, 香草, 胡椒粉, 200度焗15分鐘, 完成.
*蛋是半糖心半流心嘅, 如要熟蛋, 要加時間喔!
沒有留言:
張貼留言