蓮藕炆排骨

食材要揀當造, 時令, 一定唔會錯, 秋天已過了一半, 而家係蓮藕收成時間, 每個菜檔都有一大堆肥do do , 白雪雪蓮藕, 而家d 蓮藕已預先洗晒d泥, 要處理佢, 實在非常方便, 用小刀輕輕刮, d皮就甩晒, 再洗一洗, 又白又滑.

今日整呢味”蓮藕炆排骨”, 蓮藕香甜鬆化, 排骨又林又滑, 汁又香濃, 送飯一流. 呢碟餸前後用了一個小時, 煮個陣, 成屋都香噴噴, 小肥女猛問食得未, 最後, 當然不負我望, 佢地清晒碟, 碗底朝天啦!

材料:

蓮藕兩段(要選較圓, 肥的一段, 比較粉, 尖幼個d爽d, 適合用黎炒)

排骨半斤

南乳一舊(我今次試用超市一樽個種, 都唔錯, 個size 唔同街市個d, 所以要3舊)

柱侯醬一茶匙(隨你鍾意, 落咗會香好多, 但佢好咸, 唔好落太多)

薑3片

蒜頭4粒

冰糖一粒(大約手指公咁大)

熱水3碗

1. 蓮藕刮去外皮, 洗凈, 切成段(有人愛切厚片)

2. 排骨洗凈, 用五味醃好(糖,豉油,鹽,油,豆粉), 少d鹽, 因為南乳同柱侯都重咸味

3. 南乳用少少水攪成醬

4. 爆香蒜頭同排骨, 盛起

5. 爆香薑片和蓮藕, 加入南乳醬, 柱侯醬同爆, 即時好香, 好香

6. 先加2碗熱水和冰糖, 再加入排骨, 滾起收中慢火炆

7. 需要炆45-60分鐘直至蓮藕夠林, 其間要檢查水份, 慢慢加水

8. 炆好後, 試味

貼士:

1. 切好蓮藕如未即時煮, 需放在水中, 否則變色

2. 勿用生鐵鑊煮蓮藕, 否則黑晒, 味道冇事, 但賣相就扣晒分

在網上找到以下資料跟大家分享:

蓮藕功效多多

　　蓮藕的藥用功效十分可觀，相傳南宋孝宗曾患痢疾，就是用鮮藕汁以熱酒沖服治好的。李時珍在《本草綱目》中稱藕為“靈根”，味甘，性寒，無毒，視為祛淤生津之佳品。

　　蓮藕生食———能清熱潤肺，涼血行淤。

　　蓮藕熟吃———可健脾開胃，止瀉固精。

　　老年人常吃藕———可以調中開胃，益血補髓，安神健腦，具延年益壽之功。

　　婦女產後吃———婦女產後忌食生冷，唯獨不忌藕，是因為它能消淤。

　　肺結核病人吃———藕有清肺止血的功效，肺結核病人最宜食用。

不喜生吃的人，也可以燉雞燉肉，既能滋補，又能治病。尤其是藕粉，既富有營養又易消化，是婦幼老弱皆宜的良好補品，常以開水沖後食用，久食可安神，開胃，補髓益血，輕身延年。