蘿蔔磨菇蜆肉湯

 蘿蔔磨菇蜆肉湯

MADE IN KITCHEN 的快樂和忐忑

<一鍋例湯>

每煮一餐飯, 都要經過重重的思考和計劃, 人數, 時間, 餐單, 準備食材, 調味配搭, 看似簡單, 又可以很覆雜. 有朋友話煮飯手到拿來, 雪櫃有咩煮咩, 我煮一餐卻要腦交戰一番, 真係資質有限. 壓力亦源自珍惜每一樣寶貴的食材, 希望能把食材極致地發揮, 最怕浪費一手好材料.

 

不論是已煮過無數次的菜式, 還是試新餸, 都會忐忑到最後試味一刻, 因為小小一粒鹽, 就可以推翻全鍋菜, 太鹹就全軍覆沒.

 

小肥女常話肥媽我煮飯時間同用餐時間不合比例, 煮得耐食得快, 我同意的. 但我又鐘意慢慢煮, 有時邊煮邊發吓白日夢都唔錯呀.

 

昨晚的清雪櫃”例湯”, 是由一包冰凍蜆肉做開端, 直到全煲湯清晒, 我心才踏實吧.

 

材料:

急凍蜆肉1包

白蘿蔔1條

白磨菇1包(切片)

雞蛋3隻

薑2片

-白蘿蔔去皮切片, 連薑放鍋中, 加水煮滾

-雞蛋煎成荷包蛋切成大塊, 趁蘿蔔湯滾起時加入, 湯色很快變白色.

-煮30分鐘蘿蔔全腍, 加入磨菇及蜆肉, 煮10分鐘

-加鹽及胡椒粉調味